ӨРЕНДЕРДІ ӨНЕРГЕ БАУЛЫҒАН ЖАН
"Музыканы тыңдай және түсіне білу - эстетикалық мәдениеттің қарапайым ғана белгісі, бұл болмаса сапалы тәрбие беруді елестету мүмкін де емес" деп ұлы педагог В.А.Сухомлинский айтқандай, мектепке дейінгі білім беру ұйымдарында музыкалық тәрбие мен білім беру жолында сапалы да үздіксіз жұмыс жасап келе жатқан өз ісінің шебері, 20 жыл педагогикалық өтілі бар кәсіби маман- Ақтөбе облысы, Шалқар ауданы "Бәйтерек" бөбекжай-бақшасының музыка жетекшісі Қосбармақова Жанылған Карбозқызы.
Жанылған Карбозқызы 1980 жылы 21 мамырда Ақтөбе облысы, Шалқар қаласында дүниеге келген. Дәулеткерей атындағы Батыс Қазақстан өнер институтын бітірген. Кәсіби педагогикалық іс-тәжірибесін жинақтай отырып, мектепке дейінгі ұйымдарда балаларды сиқырлы музыка әлеміне жетелеп, бірқатар игі істер атқарып келеді.
Еңбек жолында музыкалық аспаптарда ойнауды үйрету арқылы балалардың шығармашылық қабілеттерін, инновациялық қызметті дамыту мақсатында зерттеушілік эксперимент алаңын жүргізді. Үнемі ізденіс үстінде жүретін, жаңашыл педагог Жанылған Карбозқызының Ақтөбе облысы бойынша педагог қызметкерлерінің біліктілігін арттыру институты сараптау кеңесінің шешімімен "Мектепке дейінгі балаларға ән салуды үйрету" әдістемелік көмекші құралы жарық көрді.
Балалардың эстетикалық-музыкалық қабілеттерін байыта отырып, шығармашыл тұлға тәрбиелеуде нәтижелі істерімен танылды. Жас өрендермен қажымай еңбектеніп, музыканы меңгеру деңгейі жоғары, әрі ынта-қызығушылығын жоғалтпай тәрбиелеу жолында педагог төмендегідей нәтиже көрсетіп келеді:
Ұлы ақын А.Құнанбаев шығармашылығына арналған Республикалық байқауына "вокал" жанры бойынша шәкірті Елтаева Аянат қатысып, І дәрежелі Диплом алды;
М.Мақатаевтың шығармашылығына арналған Республикалық байқауында "вокал" жанры бойынша шәкірті Мұрат Фариза І дәрежелі Дипломмен марапатталды ;
"Наурыз- праздник весны" Халықаралық шығармашылық байқауында "аспапта ойнау" жанры бойынша "Бәйтерек" балалар музыкалық аспаптар оркестрі жүлделі І орын иеленді;
"Адал ұрпақ- Мәңгілік ел болашағы" атты Халықаралық байқауында "ансамбль" номинациясы бойынша "Бәйтерек музыкалық аспаптар оркестрі" жүлделі І орын иеленді.
Әр бала меңгеруге тиісті шеберлік пен дағдыларға назар аударып, тәрбиеленушілердің музыкалық қызметін заман талабына сай шебер ұйымдастырушы Жанылған Карбозқызының нәтижелі еңбегі жалғасын таба беретініне сеніміміз мол.
Ақтөбе облыстық білім және ғылым қызметкерлері кәсіподақ ұйымының баспасөз қызметі
-
Фото
-
