ҚЫЗЫЛОРДА ОБЛЫСТЫҚ ҰЙЫМЫНЫҢ КЕҢЕС ОТЫРЫСЫ ӨТТІ
Бүгін М.Мәметова атындағы Қызылорда педагогикалық жоғары колледжінің мәжіліс залында Қызылорда облыстық кәсіподақ ұйымның Кеңес отырысы болып өтті.
Кеңес мүшелері өткен жылғы Кәсіподақ қызметінің қорытындыларын талқылап, алдағы кезеңге арналған міндеттерін айқындады.
Алқалы жиында комитет төрағасы Гүлнар Есқалиева : «2022 жыл біз үшін нәтижелі жұмыс жасалған жыл болды. Облыстық кеңес пен мүшелік ұйымдардың тәжірибелік жұмысы жоспарланған іс-шараларды орындауға, оның ішінде сала қызметкерлерінің еңбек және әлеуметтік-экономикалық мәселелерін шешуге, кәсіподақ мүшелерін жан-жақты қолдауға бағытталды. Осы ретте бірлескен табысты жұмыстарымыз үшін кәсіподақ активіне және әлеуметтік әріптестерімізге ризашылығымды білдіремін. Біздің алдымызда кәсіподақ қызметінің тиімділігін одан әрі арттыру бойынша бірқатар міндеттер тұр. Кеңес отырысының негізгі мақсаты - осы жұмыстағы басымдықтарды талқылау мен айқындау» деп бірлескен жұмысты әрі қай дамытуға шақырды. Әрі қарай Гүлнар Есқалиева Кәсіподақ ұйымы қызметіндегі Қазақстан Республикасының «Педагог мәртебесі туралы» Заңын іске асыру жұмысының жағдайы туралы хабарлама жасады.
Облыстық кәсіподақ ұйымы мен Қызылорда облыстық білім басқармасының Бірлескен шешіміне сәйкес педагогтардың кәсіби әлеуетін арттыруға арналған шаралардың жүзеге асырылу барысы туралы облыстық білім басқармасының әдістемелік оқу орталығының директоры Асқаров Сырым мен Аймақтық дене тәрбиесі методикалық орталығы спорт және ұйымдарастыру бөлімінің басшысы Танмамбетов Бағлан толығырақ баяндады.
Кәсіподақ қызметінің басым бағыттары бойынша атқарылған жұмыстар есебі тыңдалған соң Кеңес мүшелері сөз сөйлеп, пікірлерін ортаға салды. Сөз алғандар саладағы түйткілді мәселелерді қозғай отырып, ұсыныстарын жеткізді. Барлық талқыланған мәселелер бойынша кеңес мүшелері Кеңес отырысы қаулысының жобасын бірауыздан қолдады.
