КӨКСУ АУДАНДЫҚ ФИЛИАЛЫ СЕМИНАР ӨТКІЗДІ
«Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағы» қоғамдық бірлестігінің Көксу аудандық филиалында маңызды семинар өтті. Шараға білім беру мекемелерінен бастауыш кәсіподақ ұйымдарының төрағалары қатысты.
Семинарды филиал төрағасы Дина Нүсіпова ашып, күн тәртібіндегі мәселелерді таныстырды. Ол өзінің баяндамасында кәсіподақ жұмысының өзектілігіне тоқталып, бастауыш ұйымдардың қызметін күшейту, құжаттарды дұрыс жүргізу және есептілікті дер кезінде тапсырудың маңызын атап өтті.
Жиын барысында кәсіподақ ұйымдары атқаратын негізгі бағыттар мен міндеттер жан-жақты түсіндірілді. Бастауыш кәсіподақ ұйымдарында құжаттардың жүргізілу тәртібі, жылдық және тоқсандық есептердің дайындалуы, сметалық жоспар құру қағидалары, қаржылық есептерді рәсімдеу, құжаттарды реттеу, бақылау тетіктері, кәсіподақ мүшелеріне көрсетілетін әлеуметтік қолдау түрлері туралы ақпараттар берілді.
Семинар практикалық талқылау форматында өтіп, Көксу аудандық филиалдың есепшісі Татьяна Ногтева кәсіподақ жарнасының түсуі және оның жұмсалуы жайында жан-жақты ақпарат беріп, қаржының жұмсалғаннан кейінгі құжаттарының жинақталуы жайлы түсіндірді.
Шара барысында қатысушылар өздерін толғандырған сұрақтарды қойып, нақты жауаптар алды. Әсіресе есептілікті дұрыс толтыру, жаңа форматтағы құжат айналымы және кәсіподақ мүшелерімен жұмыс жүргізу мәселелері ерекше қызығушылық тудырды.
Жиын соңында қатысушылар семинардың пайдалы болғанын атап өтіп, осындай тәжірибелік-танымдық кездесулердің жұмысты тиімді ұйымдастыруға зор септігін тигізетінін жеткізді.
Көксу аудандық кәсіподақ филиалы алдағы уақытта да бастауыш ұйым төрағаларының кәсіби құзыретін арттыруға бағытталған семинарлар мен оқыту шараларын жалғастыра беретіні туралы мәлімдеді.
Жетісу облысы, Көксу аудандық кәсіподақ филиалы
