Аумақтық ұйымдардың жаңалықтары

Еңбек дауларын тиімді шешу, ұжым ішіндегі өзара түсіністік пен әлеуметтік тұрақтылықты сақтау – әрбір мекемедегі келісу комиссияларының басты міндеті. Осы бағытта Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағы облыстық ұйымға қарасты бастауыш кәсіподақ ұйымдарының келісу комиссиясы мүшелерін оқыту бойынша жүйелі жұмыс жүргізіп келеді.

Кәсіподақтың бастамасымен өткізілетін бұл семинарлар еңбек дауларының алдын алу, тараптар арасындағы келіссөз мәдениетін жетілдіру және құқықтық сауаттылықты арттыруды мақсат етеді. Алғашқы оқыту шаралары бірқатар аудандарда ұйымдастырылған болса, аталған жұмыс Талдықорған қаласында да жалғасын тапты.

Бұл семинарға облыстық ұйымға қарасты білім беру мекемелері мен Талдықорған қалалық кәсіподақ филиалының келісу комиссияларының мүшелері, бастауыш кәсіподақ ұйымдарының төрағалары мен мекеме басшылары қатысты.

Жиын барысында облыстық кәсіподақ ұйымының төрағасы Мэлс Төлепбергенов қатысушыларға кәсіподақтың еңбек қатынастарын реттеу және әлеуметтік әріптестікті дамыту бағытындағы атқарып жатқан жұмыстарын таныстырып, келісу комиссияларының рөлін күшейтудің маңыздылығын атап өтті.

Облыстық кәсіподақ ұйымының заңгер-кеңесшісі Әсет Қайырхан қатысушыларға еңбек дауларының түрлері, оларды шешу тәртібі, келіссөз жүргізудің тиімді әдістері, комиссия мүшелерінің құқықтары мен міндеттері бойынша кең көлемде ақпарат берді.

Талдықорған қаласында өткен оқыту барысында қатысушылар келісу комиссиясы отырыстарын ұйымдастыру, хаттама жүргізу талаптары, қабылданатын шешімдердің заңдық күші және еңбек заңнамасындағы туындаған жаңалықтар туралы толық ақпарат алды. Семинар ашық диалог түрінде өтіп, тыңдаушылар өзара тәжірибе алмасып, көкейдегі сұрақтарына жауап алды.

Бұл бастама – облыстық ұйымға қарасты бастауыш кәсіподақ ұйымдарының жұмысын күшейтіп, еңбек ұжымдарында әділдік пен келісім мәдениетін қалыптастыруға бағытталған маңызды қадам. Оқыту нәтижесінде келісу комиссияларының мүшелері еңбек дауларын уақтылы, заңға сай және әділ қарау үшін қажетті білім мен дағдыларын жетілдірді.

«Жетісу» жергілікті кәсіподағы алдағы уақытта да қалалар мен аудандарда осындай оқыту семинарларын жалғастырып, еңбек қатынастары мәдениетін арттыруға бағытталған іс-шараларды жүйелі түрде жүзеге асыруды жоспарлап отыр.

Жетісу облыстық ұйымының баспасөз қызметі