ЖЕТІСУДА МАЗМҰНДЫ КЕЗДЕСУ ӨТТІ
Әлемдік деңгейде өткізілетін «Гендерлік зорлық-зомбылыққа қарсы 16 күн» науқаны аясында Жетісу облысында мазмұнды шара ұйымдастырылды.
Әйелдерге қатысты зорлық-зомбылықтың алдын алу мақсатында Ескелді ауданы, Қарабұлақ орта мектебінің базасында «Әйелдер мен қыздарға қатысты цифрлық зорлық-зомбылықты жою» тақырыбында кездесу өтті.
Шараға Жетісу облысы аналар кеңесінің төрағасы Нұржамал Баймадиева, Жетісу облыстық кәсіподақ ұйымының бас маманы Маржан Жұмабек, бас есепшісі Айгүл Арымбаева, Ескелді аудандық ауруханасының тұрмыстық зорлық-зомбылықтың алдын алу жөніндегі психологі Айжан Баратовa қатысты.
Кездесу психологиялық қолдау көрсету және қоғамда қауіпсіз орта қалыптастыру бағытында ұйымдастырылып, мектеп психологтары Мөлдір Жұмағұлова мен Айдана Атеева шара қатысушыларын қарсы алып, түрлі әдістер арқылы әйелдер қауымының көңілдерін көтеріп, психологиялық ахуалды қалыптастырып, шара модераторы Ескелді аудандық кәсіподақ филиалының төрағасы Адия Айтбузиноваға жолдады. Кәсіподақ өкілі әйелдер мен қыздарды қорғау мәселесінің маңыздылығына тоқталып, қоғамды ортақ күреске шақырды.
Шара қатысушылары, өздерінің таңдаған түстеріне қарап, төрт топқа бөлінді. Плакатпен жұмыс, видеоны ашу, эксперимент және қарапайым құралдар арқылы әйелдерге келтірілетін қиындықтарды талдап, әр топ одан шығу жолдарын көрсетті.
«Отбасын қолдау орталығының» директоры Жанар Нұрмұханова отбасындағы жанжалдың салдарын талқылап, әйелдерге жасалып жатқан көмек түрлерін таныстырып, балаларға тигізетін әсері жайын сөз етті.
Ал, Отбасылық тұрмыстың зорлық-зомбылыққа қарсы күрес бөлімшесі, полиция майоры Лаура Түсіпова жыл басынан аудандық деңгейде 200-ге жуық отбасындағы кикілжіңдерге қатысты іс қозғалып, 15-і қылмыстық іске ұласқанын айтты. Жазылған өтініш негізінде әйелдер мен балалар қорғалып, басталған істің шешімі шыққанша бақылауда ұстайтындарын жеткізді.
Кездесуде қатысушылар арасында пазл құрастыру ойыны ұйымдастырылып, бірлік пен өзара қолдаудың маңыздылығы атап өтілді.
Шара соңында ұйымдастырушылар қатысушыларға зорлық-зомбылықсыз қоғам қалыптастыру әрбір адамның міндеті екенін атап өтті. Жиын қорытындысы сөзбен аяқталып, әйелдер мен қыздардың қауіпсіздігіне бағытталған жұмыстардың жүйелі түрде жалғасатыны айтылды.
Жетісу облыстық ұйымының баспасөз қызметі
