Аумақтық ұйымдардың жаңалықтары

Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының төрағасы Ерұлан Мағзымбековтың қатысуымен Кәсіподақтың Жамбыл аудандық комитетінің ІІІ Пленумы өтті. Алқалы жиында аудандық комитеттің өткен жылда атқарған жұмысы қорытындыланып, алдағы міндеттер айқындалды. Пленумда аудандық комитет төрағасы Ержан Шалимбетов пен аудандық білім бөлімі басшысының міндетін атқарушы Қуаныш Бахытұлы мектеп директорлары, балабақша меңгерушілері, бастауыш кәсіподақ ұйымдарының төрағалары мен мүшелері алдында есеп берді.

Ержан Шалимбетов есептік баяндамасында 2024 жылы аудан құрамынан Тараз қаласына 14 елді мекенмен бірге 14 бастауыш кәсіподақ ұйымының ауысуы нәтижесінде мүше саны 1400 адамға азайғанын атап өтті. Соған қарамастан, бүгінде 40 бастауыш кәсіподақ ұйымын біріктіріп отырған комитет 2807 кәсіподақ мүшесін қамтып, жыл ішінде ауқымды жұмыстар атқарған.

Әлеуметтік әріптестік жөніндегі 2024-2026 жылдарға арналған Ұжымдық шарт аясында кәсіподақ мүшелерінің заңды құқықтары мен мүдделері қорғалып, білім беру ұйымдарында туындаған келіспеушіліктер сотқа дейін аудандық келісу комиссиясында тараптардың өзара келісімімен шешілген. Есепті кезеңде Атқару комитетінің 5 отырысы өткізіліп, кәсіподақ мүшелерінің қатары артқан. Бұл көрсеткіш өткен жылы жөндеуден өтіп, орта мектеп мәртебесіне ие болған Ы.Алтынсарин атындағы және Шайдана мектептеріндегі штат санының ұлғаюымен де байланысты. Сонымен қатар сауықтыру шаралары, құқықтық кеңестер мен өзге де әлеуметтік қолдаулар комитет жұмысының оң имиджін қалыптастыруға ықпал еткен.

Жұмыс беруші тарап атынан сөз алған Қуаныш Бахытұлы Ұжымдық шарттың білім қызметкерлерінің құқықтарын қорғауда және қаржылық мәселелердің оң шешімін табуда маңызды рөл атқарғанын жеткізді. Оның айтуынша, білім бөліміне бөлінген қаражат көлемі 6,2 пайызға артқан. Атап айтқанда, 2024 жылы 20 млрд 190 млн теңге болса, 2025 жылы 22 млрд 221 млн теңгеге жеткен.

Сонымен бірге педагогтер мен кіші қызметкерлерді медициналық тексеруден өткізуге 2 млн 958 мың 775 теңге бөлінгенін атап өтті. Бұдан бөлек баяндамашы жоспарға сәйкес жыл ішінде атқарылған жұмыс пен педагогтердің жетістіктерімен де таныстырып өтті.

Жиын барысында Гродеково орта мектебінің директоры Марал Туғанбаева, №1 орта мектебі бастауыш кәсіподақ ұйымының төрағасы Шайзада Бексұлтанова және №6 Ы.Алтынсарин атындағы орта мектептің бастауыш кәсіподақ ұйымының төрағасы Мөлдір Қырықбаева өз ұжымдарындағы атқарылған жұмыстармен бөлісті.

Жергілікті кәсіподақ төрағасы Ерұлан Мағзымбеков бірыңғай ұжымдық шарттардың 2012 жылдан бері білім қызметкерлерінің құқықтары мен мүмкіндіктерін кеңейтіп, әлеуметтік әріптестікті нығайтуға ықпал етіп келе жатқанын атап өтті.

- Өткен жылы атқарылған жұмыс аз емес. Қатарымыз жаңа бастауыш кәсіподақ ұйымдарымен толықты. Ұжымдық шарт аясында кіші қызметкерлерге емделу жәрдемақысын алу, іс жүргізушілер мен хатшыларға, автобус жүргізушілеріне қосымша ақы төлеу мәселелері шешімін тапты. Соның ішінде Жамбыл ауданы Ұжымдық шарт талаптарының басым бөлігін орындап отырған алдыңғы қатарлы аймақтардың бірі. Ендігі ретте биыл мерзімі аяқталатын құжат орнына 2027-2029 жылға арналған Ұжымдық шарт мазмұнына күш салып, әлеуметтік әріптестік аясын кеңейте түсу керекпіз, - деді Ерұлан Сәбенұлы.

Пленум барысында жазбаша түскен сұрақтарға жауап беріліп, аудандық комитеттің ағымдағы жылға арналған кіріс-шығын сметасы бекітіліп, тиісті қаулылар қабылданды. Жиын соңы марапаттауға ұласты.

Жамбыл облыстық ұйымы