ЖАМБЫЛДА ЖАҢА КОНСТИТУЦИЯ НОРМАЛАРЫ ТҮСІНДІРІЛДІ
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының мәжіліс залында Жаңа Конституция нормаларын түсіндіру бойынша кездесу өтті. Ашық форматта өткен кездесуге облыстық ұйым аппараты, Филиал жетекшілері мен бастауыш ұйым төрағалары, «Еңбекші» салалық газетінің редакциясы мен «Турист» қонақ үй кешенінің қызметкерлері қатысты. Жиында Жаңа Конституция жобасының негізгі баптары мен алдағы конституциялық өзгерістердің басты бағыттары таныстырылды.
Алғашқы болып сөз алған Жергілікті кәсіподақ төрағасы, облыстық мәслихат депутаты Ерұлан Мағзымбеков әрқайсымыздың алдымызда жауапты міндет тұрғанын, оған бей-жай қарауға болмайтынын айтты.
- Әрқайсымыздың алдымызда жауапты таңдау тұр. Конституция мәтінімен танысып, шешімді саналы түрде қабылдау әр азаматтың парызы. Себебі, елдің қай бағытпен дамитыны, қоғамның қалай өзгеретіні біздің даусымызға байланысты. Өздеріңіз білесіздер, 15 наурызда Жаңа Конституция бойынша референдум өтеді. Бұл әрқайсымыздың мемлекеттік маңызы бар мәселелерге атсалысып, өз ұстанымымызды білдіру мүмкіндігі, - деді Кәсіподақ төрағасы.
Сондай-ақ, ол Ата заңның жаңа редакциясындағы адам құқықтарын қорғау, еңбек нарығын дамыту, адам капиталын нығайтуға қатысты нормаларына кеңінен тоқталды.
- Конституция - кез келген заңнан жоғары тұрады. Жаңа жобада адамның қадірі мен құқығы ең жоғары құндылық деп нақты көрсетілген. Бұл дегеніміз реформа ең алдымен әр адамның өмірін жақсартады деген сөз. Заңда еңбек ету құқығы, қауіпсіз жұмыс орны және лайықты жалақы алу құқығы айтылған. Бұл еңбек жағдайлары ең жоғары деңгейде, яғни Конституцияда бекітіледі деген сөз, - деді Ерұлан Сәбенұлы.
Кездесу барысында заңдылық, әлеуметтік әділеттілік қағидаттарын нығайту және елдің тұрақты әлеуметтік-экономикалық дамуын қамтамасыз етуге бағытталған бастамалар туралы да түсіндірілді. Жиын соңында сала өкілдері конституциялық реформаны қолдайтындықтарын айтып, бұл бастамалар еліміздің орнықты дамуына ықпал ететін маңызды қадам болатынына сенім білдірді.
Жамбыл облыстық ұйымы
-
Фото
-
