ӨЗ ІСІНІҢ ШЕБЕРІ
Ұстаздық – ұлағатты ұғым. Әсіресе мектепке дейінгі тәрбие саласында еңбек ету үлкен жауапкершілікті, мейірімділік пен кәсіби шеберлікті талап етеді. Баланың тұлға болып қалыптасуындағы алғашқы қадамдары балабақшадан басталатыны белгілі. Осындай маңызды салада өз ісінің шебері атанып жүрген тәжірибелі тәрбиешілердің бірі – Қарабалина Шынар Амандыққызы.
Қарабалина Шынар Амандыққызы — 1976 жылы 6 желтоқсанда Ақтөбе облысы Мұғалжар ауданы Көлденең темір ауылында дүниеге келген. 2014–2017 жылдар аралығында Көпсалалы «Болашақ» колледжінде «Мектепке дейінгі тәрбие және оқыту» мамандығы бойынша білім алып, кәсіби біліктілігін арттырды.
Еңбек жолын «Самал» бөбекжай-бақшасында тәрбиеші болып бастаған ол бүгінде осы мекемеде он бір жылдан бері үздіксіз қызмет атқарып келеді. Осы уақыт ішінде мол тәжірибе жинақтап, әріптестері мен ата-аналардың құрметіне бөленген білікті маманға айналды.
Шынар Қарабалина - әр баланың жеке қабілетін ескеріп, олардың жан-жақты дамуына, тәртіптілікке, әділеттілікке және өзара сыйластыққа тәрбиелеуге баса мән береді. Оның сабырлылығы мен іскерлігі, балаларға деген шынайы қамқорлығы – кәсіби шеберлігінің айқын дәлелі. Сонымен қатар ата-аналармен тығыз байланыс орнатып, әріптестерімен бірлесе жұмыс жүргізуі – ұжымдағы ынтымақ пен бірліктің нығаюына ықпал етуде. Ұжым ішінде сыйлы, өз ісіне адал маман ретінде танылған.
Еңбегінің нәтижесінде түрлі деңгейдегі байқаулар мен олимпиадаларда жетістіктерге жетті. Республикалық және облыстық олимпиадаларда үздіктер қатарынан көрініп, облыстық «Үздік ұйымдастырылған іс-әрекет» байқауында жүлделі II орынды иеленді. Сондай-ақ салалық кәсіподақтың Құрмет грамотасымен марапатталуы – оның кәсіби біліктілігі мен еңбегіне берілген жоғары баға.
Шынар Қарабалина – мамандығын шын жүректен сүйетін, жауапкершілігі жоғары, тәжірибесі мол, кәсіби шеберлігімен танылған, өз ісінің шебері атанған білікті маман.
-
Фото
-
