ЖІГЕР МЕН ТАБАНДЫЛЫҚҚА ТӘРБИЕЛЕГЕН ҰСТАЗ
Мектепте әр пәннің өзіндік орны бар. Соның ішінде дене шынықтыру пәнінің орны ерекше. Бұл тек қимыл-қозғалыс сабағы емес, жас ұрпақтың бойына жігер, төзімділік, батылдық сияқты қасиеттерді қалыптастыратын өмір мектебі. Ал сол мектептің жүрегі өз ісіне адал, шәкірт тәрбиесіне жанын салған ұстаз. Осындай ұстаздардың бірі – Рамазанов Даурен Сарсенұлы.
Даурен Сарсенұлы педагогикалық еңбек жолын 1997 жылы Қордай ауданы, Сұлутөр ауылындағы №38 орта мектепте бастады. Жас маман сол кезден-ақ ұстаздық жолдың жауапкершілігін терең түсініп, шәкірт тәрбиесіне ерекше ықыласпен қарады. 2008 жылы Қордай ауылындағы №51 мектепке ауысып, еңбек жолын жалғастырды. Ұстаздың жалпы педагогикалық еңбек өтілі 29 жыл. Осы жылдар ішінде ол өз кәсібіне деген адалдығы мен жауапкершілігінің арқасында үлкен тәжірибе жинақтады. Қазіргі таңда «педагог-сарапшы» біліктілігі бар.
Даурен Рамазанов тек сабағын сапалы өткізіп қана қоймай, мектеп ұжымының қоғамдық өміріне де белсенді араласады. Ұйымдастырылатын спорттық жарыстар, «Денсаулық күні», мұғалімдер арасындағы спартакиадалар ұжым арасындағы бірлікті нығайтып, сыйластықты арттыратын маңызды шаралар. Алайда, ұстаз еңбегінің ең үлкен жемісі – шәкірт жетістігі. Даурен Рамазанов тәрбиелеген оқушылардың спорттағы табыстары оның кәсіби шеберлігі мен қажырлы еңбегінің айқын көрінісі. Ол шәкірттеріне тек спортты үйретіп қана қоймай, олардың бойында табандылық, жауапкершілік, жеңіске деген жігер қалыптастырады. Ұстаз өз жұмысының негізгі бағыты ретінде волейбол спортын таңдады. Бүгінде оның шәкірттері волейболдан аудандық жарыстарда жүлделі орындарды иеленіп, мектеп намысын абыроймен қорғап жүр.
Осындай адал еңбегі мен шәкірт тәрбиесіндегі табандылығы арқылы Рамазанов Даурен Сарсенұлы нағыз еңбек адамының жарқын үлгісі. Өз ісіне деген сүйіспеншілік пен адал еңбек ұстаздың басты ұстанымы болып қала бермек.
Жамбыл облыстық ұйымы
