Аумақтық ұйымдардың жаңалықтары

Кәсіподақ белсенділерін жүйелі оқыту – еңбек адамдарының құқықтары мен заңды мүдделерін қорғаудың маңызды тетігі. Осы бағытта Оқу-ағарту, бюджеттік ұйымдар, ғылым және жоғары білім қызметкерлері «Жетісу» жергілікті кәсіподағының бастамасымен Ескелді ауданында кезекті семинар ұйымдастырылды.

«Кәсіподақ қызметінің негізгі бағыттары: бастауыш ұйым төрағасының рөлі мен жауапкершілігі» тақырыбындағы шараға ауданның білім беру ұйымдарындағы бастауыш кәсіподақ төрағалары қатысты. Семинардың басты мақсаты – кәсіподақ жұмысын жетілдіру, тәжірибе алмасу және өзекті мәселелерді талқылау.

Жиынды аудандық кәсіподақ филиалының төрағасы Адия Айтбузинова ашып, кәсіподақ ұйымдарының жұмысын жандандырудағы бастауыш ұйым жетекшілерінің рөліне тоқталды. Ол өз сөзінде еңбек ұжымдарындағы тұрақтылық пен әділдікті қамтамасыз етуде кәсіподақтың маңызы зор екенін атап өтті.

Семинар барысында облыстық кәсіподақ ұйымының маманы Алуа Қабдулова іс қағаздарын жүргізу тәртібі, құжаттарды рәсімдеу, хаттамаларды дұрыс толтыру, ақпараттық жұмыстарды ұйымдастыру мәселелері бойынша түсіндірме жұмыстарын жүргізді. Сонымен қатар кәсіподақ қызметінің тиімді әдістері мен заманауи тәсілдері таныстырылды.

Тәжірибе алмасу алаңында Бақтыбай Жолбарысұлы атындағы орта мектебі бастауыш кәсіподақ ұйымының төрағасы Райгуль Увалиева өз жұмысының оң тәжірибесімен бөлісіп, кәсіподақ мүшелерінің белсенділігін арттыру жолдарын ортаға салды.

Сондай-ақ облыстық кәсіподақ ұймының заңгер-кеңесшісі Әсет Қайырхан еңбек заңнамасындағы өзгерістерге тоқталып, педагогтардың еңбек құқықтарын қорғау, жалақы төлеу, жұмыс жүктемесін бөлу, қосымша міндеттерді атқару, ұжымдық шарттың маңызы сияқты мәселелерге кеңінен түсінік берді.

Шара соңында қатысушылар өздерін толғандырған сұрақтарына жауап алып, пікір алмасты. Ұйымдастырушылар мұндай мазмұнды кездесулер алдағы уақытта да жалғасын табатынын жеткізді.

Жетісу облыстық кәсіподақ ұйымы