ЕҢБЕК АДАМЫ
📚 Кітапханашы – рухани қазынаны сақтаушы, білім мен мәдениеттің шамшырағы, ұрпақтар сабақтастығын жалғаушы маңызды мамандық иесі.
😊 Жұмабекова Ғалия Зұлкарнайқызы — 1963 жылдың 10 ақпанында Ақтөбе облысы Мәртөк ауданында дүниеге келген. Балалық шағы қарапайым еңбекқор отбасында өтті. Бес баланың ортасында өскен Ғалия Жұмабекова жастайынан еңбекке, тәртіпке бейім болып қалыптасты.
🎒 1970 жылдың 1 қыркүйегінде Жайсаң орта мектебінің табалдырығын аттап, білім жолын бастайды. Мектеп қабырғасында жүріп-ақ кітапқа деген ерекше қызығушылығы байқалады. Бұл қызығушылық кейін оның өмірлік мамандығын таңдауға негіз болды.
📖 1980-1982 жылдары мәдени-ағартушылық училищесінде білім алып, кітапханашы мамандығын игерді. Оқуын аяқтаған соң Ақтөбе қаласындағы облыстық жасөспірімдер кітапханасында еңбек жолын бастайды. Алайда отбасылық жағдайға байланысты туған жері Жайсаң ауылына қайта оралуына тура келеді.
👩🏫 1984 жылдың 4 қаңтарынан бастап Жайсаң балабақшасында тәрбиеші болып қызмет етеді. Сол жылдың 1 тамызынан бастап Жайсаң орта мектебіне кітапханашы қызметіне қабылданып, осы салада ұзақ жылдар бойы үздіксіз еңбек етеді. Оның кітапхана ісіне деген адалдығы мен жауапкершілігі көпшіліктің құрметіне ие болды.
🌟 Ғалия Жұмабекова Жайсаң орта мектебінде 41 жыл бойы кітапханашы қызметін абыроймен атқарды. Осы уақыт ішінде ол оқушылардың кітапқа деген сүйіспеншілігін арттырып, білімге деген құштарлығын оятуға зор үлес қосты. 2024 жылдың ақпан айында зейнеткерлікке шықса да, бүгінгі таңда сүйікті мектебінде еңбек жолын жалғастырып келеді.
🏅 Еңбек жолында ол көптеген марапаттарға ие болды. Облыстық және аудандық білім бөлімдерінің мадақтамалары мен алғыс хаттары, Мәртөк орталықтандырылған кітапхана жүйесі директорының алғыс хаты – оның еңбегінің айқын дәлелі. Сонымен қатар, 2023 жылы облыстық кәсіподақ ұйымы тарапынан «Мерке» шипажайына жолдама беріліп, еңбегі жоғары бағаланды.
💐 Ғалия Жұмабекованың өмір жолы – адал еңбек пен мамандыққа деген сүйіспеншіліктің жарқын үлгісі. Оның еңбегі мен тәжірибесі жас ұрпаққа әрдайым үлгі болып қала береді.
--
Ақтөбе облыстық кәсіподағы
