САРҚАНДА КӘСІПОДАҚ ӨКІЛДЕРІ ЕҢБЕК ҰЖЫМЫМЕН КЕЗДЕСТІ
Сарқан қаласындағы облыстық №3 арнайы мектеп-интернатында кәсіподақ өкілдерінің еңбек ұжымымен кездесуі өтті. Жиынның басты мақсаты – білім беру саласы қызметкерлерінің еңбек құқықтарын қорғау, әлеуметтік-еңбек қатынастарына қатысты өзекті мәселелерді талқылау және кәсіподақ қызметінің маңызын түсіндіру болды.
Мектеп-интернаттың директоры Бахытгуль Сарсенбаева еңбек ұжымының жай-күйімен таныстырып, кәсіподақ тарапынан жасалған барлық қолдауларды айтып, сала қызметкерлерінің біліктіліктерін арттыруға басымдық бергенін жеткізіп, облыстық ұйымға алғысын білдірді.
Кездесуде Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағының төрағасы Мэлс Төлепбергенов еңбек адамының сенімді қорғаны, әлеуметтік әріптестіктің маңызды тетігі ретінде жұмыс істейтінін айтып, әрбір қызметкердің құқықтары мен заңды мүдделерін қорғау, олардың еңбек жағдайын жақсартуға нақты қолдау көрсету мақсатында ауқымды жұмыстар атқарып жатқанын атап өтті.
Облыстық ұйымның заңгер – кеңесшісі Әсет Қайырхан еңбек заңнамасындағы өзгерістер, қызметкерлердің құқықтары мен міндеттері, әлеуметтік кепілдіктер мәселелері туралы толық ақпараттармен бөлісті.
Жиын барысында ұжым мүшелері өздерін толғандырған сұрақтарын қойып, нақты жауаптар алды. Әсіресе жалақы төлеу, еңбек демалысы, жұмыс жүктемесі және ұжымдық шарттың орындалуы секілді мәселелер төңірегінде пікір алмасу өтті.
Кәсіподақ өкілдері мұндай кездесулердің маңызы зор екенін атап өтіп, еңбек адамдарының құқықтарын қорғауда әрқашан қолдау көрсетуге дайын екендерін жеткізді.
Жетісу облыстық кәсіподақ ұйымының баспасөз қызметі
