ЖАС КЕЛСЕ - ІСКЕ
Жас ұстаз – жаңашылдықтың жаршысы. Ол білім берудің жаңа әдіс-тәсілдерін меңгеріп, оқушыларға сапалы білім мен саналы тәрбие беруге ұмтылады. Осындай талаптарға сай еңбек етіп жүрген ойылдық жас мамандардың бірі – Айдана Жәнібекқызы.
Айдана Жәнібекқызы - 1993 жылы 6 мамырда АҚТӨБЕ ОБЛЫСЫ Ойыл ауданы Ойыл селосында дүниеге келген. Бала кезінен жауапкершілігі жоғары, білімге құштар болып өскен ол бүгінгі күні ұстаздық жолды таңдаған.
2011 жылы Ойыл қазақ орта мектебін үздік аяқтап, Қ.Жұбанов атындағы Ақтөбе өңірлік мемлекеттік университетіне оқуға түсті.
Еңбек жолын 2015 жылы өзі білім алған Ойыл қазақ орта мектебінде бастап, осы күнге дейін сол білім ордасында үздіксіз ұстаздық қызмет атқарып келеді.
Айдананың кәсіби жетістіктері де айтарлықтай. Ол «Үздік сынып жетекші – 2024» облыстық байқауының жеңімпазы, «Педагогикалық идеялар панорамасы – 2024» байқауының ІІІ орын иегері, «Педагогикалық идеялар – 2025» аудандық байқауының І дәрежелі диплом иегері және облыстық кезеңінің ІІІ орын жүлдегері. Сонымен қатар облыстық пәндік олимпиадада ІІ орынды иеленген.
Айдана тек кәсіби дамумен шектелмей, шәкірт тәрбиесіне де ерекше көңіл бөледі. Ол жыл сайын «Зерде» ғылыми жобалар байқауына оқушылар дайындап, олардың түрлі жетістіктерге жетуіне ықпал етуде. Тәрбиелеген шәкірттері облыстық деңгейде ІІ және ІІІ орындарды иеленіп жүр. Жуырда өткен облыстық пәндік олимпиадада да оның шәкірті ІІІ орынға қол жеткізді.
Айдана Жәнібекқызының еңбек жолы – жас мамандарға үлгі. Оның тың идеяларға толы шығармашылығы «Жас келсе – іске» деген сөздің шынайы дәлелі.
