АБЫРОЙЛЫ ҚЫЗМЕТТІҢ ЖАРҚЫН БЕЛЕСІ
Бүгін АҚТӨБЕ ОБЛЫСТЫҚ білім және ғылым қызметкерлері кәсіподағы ұйымының бас маманы Айжарық Серімбетов №48 жалпы білім беретін орта мектептің басшысы Қарлыға Әбуованы зейнеткерлік демалысқа шығарып салу шарасына қатысты. Тағылымы мол жиынға әріптес ұстаздар мен кәсіподақ өкілдері қатысып, ұзақ жылдық еңбегі үшін ризашылықтарын білдірді.
Салтанатты шара барысында Ақтөбе облыстық білім және ғылым қызметкерлері кәсіподағы ұйымының бас маманы Айжарық Серімбетов ұйым төрағасының құттықтауын жеткізіп, Қарлыға Әбуоваға облыстық кәсіподақ атынан «Әлеуметтік әріптестікке қосқан үлесі үшін» төсбелгісін және шипажайға жолдама сертификатын табыстады. Шараға жиналған қауым ұстаздың білім беру саласына сіңірген еңбегін ерекше атап өтіп, жылы лебіздері мен ізгі тілектерін арнады.
Айта кетейік, Қарлыға Әбуова — 1964 жылы 14 желтоқсанда Ақтөбе облысы Мұғалжар ауданында дүниеге келген. 1990 жылы Ақтөбе педагогикалық институтының физика факультетін тәмамдап, физика-информатика пәнінің мұғалімі мамандығын алған. Педагог-зерттеуші санатындағы ұстаздың жалпы еңбек өтілі 43 жыл болса, оның 40 жылы білім беру саласына арналған.
Еңбек жолын Ақтөбе қаласындағы Ғ.Ақтаев атындағы №6 орта мектепте бастап, кейін №34 орта мектепте ұстаздық етіп, директордың орынбасары қызметтерін атқарды. 2012-2022 жылдары №37 орта мектептің директоры болып, білім ордасының материалдық-техникалық базасын нығайтуға, оқу сапасын арттыруға зор үлес қосты.
2022 жылдан бастап №48 жалпы білім беретін орта мектептің басшысы қызметін атқарып, білім сапасын арттыру, мектептің инфрақұрылымын жетілдіру бағытында жүйелі жұмыстар жүргізді.
Ұзақ жылдық еңбегімен шәкірт тәрбиелеп, білім саласының дамуына өлшеусіз үлес қосқан Қарлыға Қоғабайқызы әріптестері арасында зор құрметке ие. Жиын соңында әріптестері ардақты ұстазға алғыс айтып, денсаулық пен ұзақ ғұмыр тіледі.
