ЖАС МАМАНДАР ЖАРЫСЫ
Ақтөбе облысы Алға аудандық білім қызметкерлері кәсіподақ ұйымы жанынан құрылған Жастар кеңесінің бастамасымен “Үздік көшбасшы – 2026” атты жас мамандар арасындағы аудандық дебат турнирі ұйымдастырылды.
Аталған турнирге 11 фракция қатысып, жас мамандар өзара білімін, ой ұшқырлығын және шешендік қабілетін сынға салды. Әр команда өз ұстанымын дәлелдеп, тартысты пікірталас өрбітті.
Жарыс қорытындысы бойынша бірінші орынды №4 Алға орта мектебінің “Алтын қазық” фракциясы иеленді. Команда құрамында Нұржайна Бегалиева мен Дамира Жақсылық жоғары деңгейде өнер көрсетті. Ал, екінші орын А.Байтұрсынов атындағы орта мектептің “Байтұрсынов жастары” фракциясына бұйырды. Бұл командада Еркебұлан Аманғалиев мен Әсем Куванова өз білімдерімен көзге түсті. Үшінші орынды “Қарақұдық орта мектебі” фракциясы жеңіп алды. Ақниет Оралмағанбет пен Нұрайым Кеңесова сайыста белсенділігімен ерекшеленді.
Сонымен қатар “Үздік спикер” номинациясы Мөлдір Жұмағалиеваға берілді. Ол шешендігі мен дәлелді пікір айту шеберлігі арқылы қазылар алқасының жоғары бағасына ие болды.
Шара соңында аудандық кәсіподақ ұйымы тарапынан қатысушыларға ақшалай сыйақылар табысталып, жеңімпаздар мен белсенді қатысушылар арнайы марапаттарға ие болды.
