ЖАС МАМАНДАРҒА ЖОЛ КӨРСЕТКЕН КЕЗДЕСУ
Хромтау аудандық білім қызметкерлері кәсіподағы ұйымының жанынан құрылған Жастар кеңесінің ұйымдастыруымен “Жастар кәсіподақ ұсынады: XXI ғасыр мұғалімі – дағды, mindset, мүмкіндік” атты жас жетекшілер мектебінің кезекті басқосуы өтті.
Шараның ашылуында аудандық кәсіподақ ұйымының төрағасы Гүлжан Ақанова бүгінгі жас мамандардың білім беру жүйесіндегі рөліне тоқталды. Кәсіподақ төрағасы өз сөзінде қазіргі заман мұғаліміне қойылатын талаптардың артып отырғанын, соған сәйкес жастардың кәсіби біліктілігі мен тұлғалық дамуы қатар жүруі қажеттігін атап өтті. Сонымен қатар, кәсіподақ тарапынан жас мамандарға көрсетіліп отырған қолдаудың маңыздылығына ерекше тоқталып, олардың еңбек құқықтарын қорғау, әлеуметтік жағдайын жақсарту және кәсіби тұрғыда дамуына бағытталған түрлі бастамалардың жүзеге асырылып жатқанын жеткізді.
Кездесу барысында жас педагогтар белсенділік танытып, үш топқа бөлініп, түрлі бағыттар бойынша топтық тапсырмалар орындады. Әр топ өз идеяларын ортаға салып, пікір алмасып, тәжірибелерімен бөлісті. Бұл жұмыс форматы қатысушылардың шығармашылық ойлауын дамытып, жаңа көзқарастар қалыптастыруға мүмкіндік берді.
Іс-шараға арнайы қатысқан Хромтау аудандық білім бөлімінің басшысы Шерхан Отаров пен Дөң мектеп-гимназиясының директоры Гүлсезім Нұрболқызы жас мамандармен ашық диалог құрып, өз тәжірибелерімен бөлісті. Спикерлер педагогикалық қызметтегі табысқа жетудің жолдары, көшбасшылық қасиеттерді дамыту және үздіксіз ізденістің маңыздылығы туралы ойларымен бөлісіп, жастарға бағыт-бағдар берді.
Кездесудің ең әсерлі сәттерінің бірі – қатысушыларға “1 жылдан кейін мен қандай мұғалім боламын?” деген сұрақ қойылып, әрқайсысы өз мақсат-мұратын қағазға түсіріп, арнайы қорапқа салуы болды. Бұл ерекше әдіс жас педагогтарға өз болашағын жоспарлауға, нақты мақсат қоюға мүмкіндік берді. Ең қызығы, дәл бір жылдан кейін осы хаттар қайта ашылып, әр қатысушы өз жетістіктерін саралайтын болады.
Жалпы, кездесу мазмұнды өтіп, жас педагогтар үшін ой саларлық, тәжірибе мен шабытқа толы маңызды алаңға айналды.
Ақтөбе облыстық кәсіподағы
