КӘСІПОДАҚ ҚАМҚОРЛЫҒЫ – ҰСТАЗДАРҒА КӨРСЕТІЛГЕН ШЫНАЙЫ ҚОЛДАУ
Білім саласы қызметкерлерінің әлеуметтік қорғалуы тек еңбек құқықтары мен заңды мүдделерін қорғаумен ғана шектелмейді. Ұстаздардың денсаулығын нығайту, олардың сапалы демалысын қамтамасыз ету, еңбекке деген ынтасын арттыру және кәсіби әлеуетін қолдау – Түркістан облыстық кәсіподақ ұйымы қызметінің басым бағыттарының бірі. Осы бағыттағы жүйелі жұмыстардың нәтижесінде кәсіподақ мүшелері жыл сайын сауықтыру шараларымен қамтылып, өз денсаулықтарын жақсартуға мүмкіндік алып келеді.
Түркістан облыстық кәсіподақ ұйымының бастамасы мен жан-жақты қолдауының, сондай-ақ облысқа қарасты қала және аудандық филиалдардың үйлесімді жұмысының арқасында бүгінде көптеген педагогтар еліміздің үздік шипажайларында ем қабылдап, тынығып жатыр. Атап айтқанда, Көктерек, Хадия, Ақ-су Демі, Мерке, Шымбұлақ, Атлант және Сарыағаш шипажайларында ұстаздарымыздың денсаулығын қалпына келтіруге барлық жағдай жасалған.
Ұстаз – ұлттың болашағын тәрбиелейтін ең қастерлі мамандық иесі. Сондықтан олардың денсаулығына қамқорлық жасау – келешек ұрпақтың сапалы білім алуының кепілі. Осы жауапкершілікті терең сезінетін Түркістан облыстық кәсіподақ ұйымы педагогтердің әлеуметтік әл-ауқатын арттыруға бағытталған игі бастамаларды тұрақты түрде жүзеге асырып келеді.
Бұл – кәсіподақтың әрбір мүшесіне деген нақты қамқорлығы мен қолдауының жарқын көрінісі. Кәсіподақтың қолдауымен ұйымдастырылып отырған сауықтыру шаралары ұстаздардың күш-қуатын қалпына келтіріп қана қоймай, олардың жаңа оқу жылына тың серпінмен, жоғары жауапкершілікпен және зор жігермен оралуына мүмкіндік береді. Осындай игілікті істер кәсіподақ ұйымының қоғамдағы беделін арттырып, білім қызметкерлерінің сенімі мен бірлігін нығайта түсуде.
Түркістан облыстық кәсіподақ ұйымы алдағы уақытта да білім саласы қызметкерлерінің әлеуметтік жағдайын жақсартуға, еңбек құқықтарын қорғауға, денсаулығын нығайтуға және лайықты демалысын ұйымдастыруға бағытталған жұмыстарды жүйелі түрде жалғастыра береді. Ұстазға көрсетілген құрмет – елдің ертеңіне жасалған инвестиция. Барша педагогтерімізге мықты денсаулық, көтеріңкі көңіл күй, баянды бақыт және толайым табыс тілейміз!
--
Түркістан облыстық кәсіподақ ұйымы
-
Фото
-
